ചരിത്രം

സേവന സന്നദ്ധതക്ക് മുന്‍തൂക്കം നല്‍കികൊണ്ടും പ്രയോജനപ്പെടുത്തികൊണ്ടും ജനകീയ കൂട്ടായ്മയോടുകൂടിയ മനുഷ്യാദ്ധ്വാന വിനിയോഗത്തിലൂടെ പഞ്ചായത്തിനെ വികസനപാതയിലേക്ക് നയിക്കുന്ന സമീപനമാണ് 1952 മുതല്‍ക്കുതന്നെ ഇവിടെ അന്വര്‍ത്ഥമാക്കിയതും ഇപ്പോഴും തുടരുന്നതും. ഇതിന്റെ മകുടോദാഹരണമായി എടുത്തുകാട്ടാവുന്നതാണ് തദ്ദേശവാസികളാല്‍ ശ്രമദാനത്തിലൂടെ നിര്‍മ്മിക്കപ്പെട്ട് പഞ്ചായത്തിന് കൈമാറപ്പെട്ട പഞ്ചായത്തിലെ 85 ശതമാനത്തിധികം വരുന്ന ഗ്രാമീണ റോഡകളും.

1936 ല്‍ രൂപം കൊണ്ട കാങ്കോല്‍ ഗ്രാമപഞ്ചായത്തിന്റെ പ്രസിഡന്റായി പരേതനായ ജനാബ് നങ്ങാരത്ത് മുഹമ്മദ്കുഞ്ഞി എന്നിവരാണ് ഭരണ നേതൃത്വം ഏറ്റെടുത്തത്. 1952 ല്‍ നടന്ന ആദ്യതിരഞ്ഞെടുപ്പില്‍ പഞ്ചായത്തിന്റെ പ്രസിഡന്റ് പദവിയിലേക്ക് തിരഞ്ഞെടുക്കപ്പെട്ടത് സഖാവ് എം.വി.എം കുഞ്ഞിവിഷ്ണു നമ്പീശനാണ്. ബഹു. മുഖവ്യക്തിത്വത്തിന്റെ ഉടമയായ ഇദ്ദേഹം ശ്രദ്ധേയമായ വികസന പ്രവര്‍ത്തന പ്രവര്‍ത്തനങ്ങള്‍ നടത്തി. അന്ന് പ്രധാനമന്ത്രിയായിരുന്ന ശ്രീ ജവഹര്‍ലാല്‍ നെഹ്റുവില്‍ നിന്നും മികച്ച പഞ്ചായത്തിനുള്ള  ദേശീയ അവാര്‍ഡ് നേടിയെടുത്തത് ഇദ്ദേഹത്തിന്റെ കാലഘട്ടത്തിലാണ്.

ബ്രിട്ടീഷ് സാമ്രാജ്യത്വത്തിനെതിരായി ദേശീയ സ്വാതന്ത്രത്തിനുവേണ്ടി അക്കാലത്തു നടന്ന പോരാങ്ങളിലും പ്രക്ഷോഭങ്ങളിലും ഈ പഞ്ചായത്ത് പ്രദേശത്തെ യുവാക്കളും സജീവമായി പങ്കുകൊണ്ടിട്ടുണ്ട്.

1939ല്‍ ആലക്കാട്ടെ കുടികിടപ്പുകാരന്‍ ക്ടാരന്‍ ചന്തുവിനെ ഒഴിപ്പിച്ച മണിപ്പുഴ ഇല്ലം നമ്പൂതിരിയുടെ നടപടിക്കെതിരെ സഖാവ് എ വി കുഞ്ഞമ്പുവിന്റെ നേതൃത്വത്തില്‍ കൃഷിക്കാരെ സംഘടിപ്പിക്കുകയുമുണ്ടായി.ഈ സമരത്തില്‍ സഖാവ് എ കെ ജി അടക്കമുള്ള നേതാക്കളുടെ ഇടപെടലുകളും ഉണ്ടായപ്പോള്‍ ജന്മി മണിപ്പുഴ ഇല്ലം നമ്പൂതിരി ഒഴിപ്പിക്കലില്‍ നിന്ന് പിന്‍വാങ്ങുകയും ചെയ്തു.

മറ്റു പ്രദേശങ്ങളിലെ പോലെ തന്നെ ഈ ഗ്രാമത്തിലും ഈശ്വരാരാധനയുമായി ബന്ധപ്പെട്ട് വിവിധ രീതിയിലുള്ള ആചാരാനുഷ്ഠാനങ്ങള്‍ പുലര്‍ത്തി പോരുന്ന വിവിധ സമുദായക്കാരാണ് ഇവിടെ അധിവസിച്ചു വരുന്നത്. വിശ്വാസങ്ങളുടെ ഭാഗമായി കാവുകളിലും ക്ഷേത്രങ്ങളിലും വിവിധ രീതിയിലുള്ള ഈശ്വരാരാധന നടത്തി വന്നിരുന്നു എന്നതിന് നിരവധി തെളിവുകള്‍ ഇന്നും നിലനില്‍ക്കുകയാണ്.