ഭൂപ്രകൃതി

പഞ്ചായത്തിന്റെ വടക്കേ അതിര്‍ത്തിയില്‍ നിന്ന് ഉദ്ഭവിച്ച് തെക്ക് കിഴക്കു ഭാഗത്തേക്ക് 9 കി മീ ദൂരം ഒഴുകി എരമം കുറ്റൂര്‍ പഞ്ചായത്തിലേക്ക് പ്രവേശിക്കുന്ന കുറിവേലിതോടും വടക്കേ അറ്റത്തു നിന്നു തന്നെ ഉദ്ഭവിച്ചു കൊണ്ട് 8 കി മീ നീളത്തില്‍ തെക്ക് പടിഞ്ഞാറേക്ക് ഒഴുകി കരിങ്കുഴി വലിയ തോടുമായി ചേരുന്ന ആലപ്പടമ്പ് തോടുമാണ് പഞ്ചായത്തിലെ പ്രധാന തോടുകള്‍. കിഴക്കെ അതിര്‍ത്തിയില്‍ നിന്ന് ആരംഭിച്ച് പടിഞ്ഞാറോട്ടു ഒഴുകി കരിങ്കുഴി വലിയ തോടില്‍ തന്നെ ചേരുന്ന ആലക്കാട് തോടും വടക്കെ അതിര്‍ത്തിയില്‍ നിന്ന് ഉത്ഭവിച്ച് കുറുവേലി തോടുമായി ചേരുന്ന ഒയോളംതോടും പ്രധാന ചെറുതോടുകളാണ്.

അപൂര്‍വ്വവും അത്യപൂര്‍വ്വവുമായി കാണപ്പെടുന്ന സസ്യ ജനുസ്സുകള്‍ കൊണ്ട് അനുഗ്രഹീതമാണ് കാങ്കോല്‍ ആലപ്പടമ്പ്. തേക്ക്, ഇരുള്‍ ‍, മരുത്, തടിച്ചില്‍‍ , എടയ, കരിയ, കറുകുട്ടി, ഇരഞ്ഞി, കാഞ്ഞിരം, കാട്ടുകുടുക്ക, അമ്പഴം, മഞ്ചാടി, വെങ്കണ, കനിമരുത്, ചേരല്‍ , വീമ്പ്, പൂവ്വം, താന്നി, ഉരുപ്പ്, ഏലോം, കരയം, പന, അത്തി, ഇത്തി, ആല്‍ , അരയാല്‍ , തേമ്പതി, ആലം ആവല്‍, അകില്‍ ‍, അകില്‍ ചന്ദനം, വേണ്ട, ഞാവല്‍ ‍, പൂവ്, പാല തുടങ്ങിയ വന്‍ വൃക്ഷങ്ങള്‍ കൊണ്ട് സമൃദ്ധമായിരുന്നു ഈ നാട് എന്നാല്‍ ജനവാസം കൂടി വന്നപ്പോള്‍ ഇവയുടെ എണ്ണത്തില്‍ വല്ലാതെ കുറവ് വന്നിട്ടുണ്ടെങ്കിലും പേരിന് ഇന്നും എല്ലാം നിലനില്‍ക്കുന്നുണ്ട്.

ചരിവ് പ്രദേശങ്ങളില്‍ കമ്ടു വരുന്നത് ചരല്‍ കലര്‍ന്നതും ജൈവാംശം കുറഞ്ഞതുമായ ചരല്‍ മണ്ണാണ്. ജലനിര്‍ഗ്ഗമന സാദ്ധ്യത കൂടുതലായതിനാല്‍ ഈ പ്രദേശങ്ങളില്‍ ജലലഭ്യത വളരെ കുറവാണ്. വേനല്‍കാലമാകുന്നതോടുകൂടി വരള്‍ച്ചയും കുടിവെള്ളക്ഷാമവും ഈ പ്രദേശങ്ങളില്‍ അനുഭവപ്പെട്ടുവരുന്നു. മണ്ണൊലിപ്പും സസ്യാവരണ ശോഷണവും ഈ മേഖലയിലെ ഒരു പാരിസ്ഥിതിക പ്രശ്നമാണ്. മുഖ്യ കൃഷി കശുമാവ് ആണെങ്കിലും ചെരിവിന്റെ താഴെ ഭാഗങ്ങളിലും മടക്കുകളിലും തെങ്ങ്, കവുങ്ങ്, കുരുമുളക്, വാഴ, പൈനാപ്പിള്‍ എന്നിവ സമ്മിശ്രമായി കൃഷി ചെയ്യുന്നു. റബ്ബര്‍ പ്രധാന വിളയായി കൃഷി ചെയ്യുന്നതും ആരംഭിച്ചിട്ടുണ്ട്.